Afrikaans 100 met Lizz Meiring is die nuwe solo-produksie wat volgende jaar die 100-jarige bestaan van Afrikaans as amptelike taal vier. Lizz het die oorspronklike idee gehad en al vir maande lank is sy besig met die navorsing en samestelling van die vertoning – alles om ‘n lekker, lagwekkende en soms verrassende kykervaring te skep!

In hierdie produksie neem Lizz jou op ‘n reis deur elke dekade sedert Afrikaans in 1925 amptelik as ‘n landstaal erken is.

Wat kan jy verwag? Sketse, stories, gedigte, verse, monoloë, nuusberigte, en selfs ou advertensies – wat baie interessant is, want die eerste Afrikaanse advertensies was vir medisyne, salwe, pille, strope en poeiers! (Wie sou dit nou nie wil weet nie?)

Lizz is al maande besig om alles saam te stel en haar navorsing was nie net “blaai deur die boeke” nie – nee, sy het die hele Afrikaanse kultuurlandskap deurkruis om die mooiste (en soms vreemdste) oomblikke te kry om met haar gehoor te deel. Die vertoning is nie net slim en vermaaklik nie, maar dit sal ook jou hart warm maak van lag en soms ‘n stukkie nostalgie.

Die vertoning is so saamgestel dat dit beide gesinne en volwassenes sal laat lag, en jy sal nie ‘n sekonde van hierdie 70 minute wil mis nie.

Taal: Afrikaans, natuurlik!